अमेरिका पठाइदिने भन्दै करोडौँ ठगी र मानव तस्करीमा संलग्न दुई जना पक्राउ

काठमाडौं, वैशाख ३० । मानव बेचबिखन अनुसन्धान ब्युरोले अमेरिका पठाइदिने प्रलोभन देखाएर करोडौँ रुपैयाँ ठगी तथा मानव तस्करीमा संलग्न दुई जनालाई पक्राउ गरेको जनाएको छ ।
ब्युरोका अनुसार पक्राउ पर्नेमा स्याङ्जाको पुतलीबजार नगरपालिका–४ का ४४ वर्षीय शिवबहादुर थापा र रुपन्देहीको शान्तिनगर गाउँपालिका–३ का २६ वर्षीय लोकमान खत्री रहेका छन् ।
प्रहरीले सार्वजनिक गरेको विवरणअनुसार शिवबहादुर थापाले दुबई हुँदै अमेरिका पठाइदिने भन्दै एक पीडितसँग करिब ६० लाख रुपैयाँ लिएको आरोप छ । उनले पीडितलाई २०७८ वैशाख ११ गते नेपालबाट दुबई पुर्‍याई विभिन्न देश हुँदै अमेरिका लैजाने आश्वासन दिएका थिए । त्यसक्रममा पीडितलाई लामो समयसम्म विभिन्न देशमा राखिएको, शारीरिक तथा मानसिक यातना दिइएको र थप रकम माग गरिएको ब्युरोले जनाएको छ ।
पीडितबाट विभिन्न विदेशी बैंक खाता तथा वेस्टर्न युनियनमार्फत पटक–पटक गरी करिब एक करोड ४२ लाख रुपैयाँ बराबर रकम असुल गरिएको प्रहरीले जनाएको छ । पछि कोलम्बियाबाट पनामा, मेक्सिको हुँदै अमेरिका लैजाने प्रयास गरिए पनि पीडित अलपत्र परेका थिए । अन्ततः पीडितलाई अमेरिकाबाट ‘वन वे ट्राभल डकुमेन्ट’ बनाएर नेपाल फर्काइएको ब्युरोले उल्लेख गरेको छ ।
यस्तै, अर्का पक्राउ परेका लोकमान खत्रीले बेलायतको ‘भिजिट भिसा’लाई ‘वर्किङ भिसा’मा परिवर्तन गराइदिने तथा पछि अमेरिका पठाइदिने प्रलोभन देखाएर एक व्यक्तिबाट ठूलो रकम असुलेको आरोप छ । ब्युरोका अनुसार उनले सुरुमा बेलायत पठाउने नाममा २५ लाख रुपैयाँ लिएका थिए । त्यसपछि अमेरिका पठाउन थप ४५ लाख रुपैयाँ लाग्ने भन्दै विभिन्न चरणमा रकम उठाइएको थियो ।
पीडितलाई नेपालबाट दुबई, भारत, कतार, स्पेन, ब्राजिल, पेरु, इक्वेडर, कोलम्बिया, पनामा, कोस्टारिका, निकारागुवा, होन्डुरस र मेक्सिको हुँदै अवैध रूपमा अमेरिका पुर्‍याइएको प्रहरीले जनाएको छ । पछि अमेरिकी प्रहरीले अवैध प्रवेशको आरोपमा पक्राउ गरी १४ महिना जेलमा राखेको र त्यसपछि नेपाल फर्काइएको ब्युरोले जानकारी दिएको छ ।
ब्युरोले दुवै घटनामा काठमाडौं जिल्ला अदालतबाट म्याद थप अनुमति लिई थप अनुसन्धान भइरहेको जनाएको छ । साथै, प्रारम्भिक अनुसन्धानका क्रममा पक्राउ परेका व्यक्तिहरूले अन्य नेपाली नागरिकलाई समेत अमेरिका लगायतका देशमा पठाउने नाममा ठगी तथा मानव तस्करी गरेको हुनसक्ने आशंकामा थप अनुसन्धान अघि बढाइएको प्रहरीले जनाएको छ ।