रोल्पामा पहिरोमा परी मृत्यु हुनेको संख्या १० पुग्यो, तीन जना बेपत्ता

रोल्पा, साउन २८ । रोल्पाको थबाङ गाउँपालिका–५ कोटलबारामा अविरल वर्षासँगै आएको पहिरोले घर तथा गोठ पुरिँदा मृत्यु हुनेको संख्या १० पुगेको छ। पहिरोमा परी दुई जना घाइते भएका छन् भने तीन जना अझै बेपत्ता छन्।
नेपाल प्रहरीका अनुसार पहिरोमा पुरिएर रोल्पामा पाँच जनाको मृत्यु भएको छ। थप पाँच जनाको शव प्युठानमा भेटिएको प्रहरीले जनाएको छ।
रोल्पामा मृत्यु हुनेमा थबाङ गाउँपालिका–५ का १८ वर्षीया शान्ती पुन मगर, ६० वर्षीय कमलबहादुर पुन मगर, ८० वर्षीया मनखना पुन मगर, ७५ वर्षीय दलबहादुर पुन मगर र ८५ वर्षीया हस्तकला रोका मगर रहेका छन्।
यस्तै, पहिरोमा परी बेपत्ता भएका थबाङ गाउँपालिका–५ कोटलबाराका ७ वर्षीय अशोक पुन मगरसहित पाँच जनाको शव प्युठानमा फेला परेको प्रहरीले जनाएको छ। प्युठानमा भेटिएका मृतकमा ३४ वर्षीय महेन्द्र घर्ती, ६६ वर्षीया मनि पुन मगर, ३४ वर्षीया विष्णु पुन भन्ने जुनकुमारी पुन मगर र ८० वर्षीय बलबहादुर पुन मगर रहेका छन्।
पहिरोमा परी थबाङ गाउँपालिका–५ का २२ वर्षीय हिमाल पुन मगर र २५ वर्षीय सञ्जय घर्ती मगर घाइते भएका छन्। उनीहरूलाई उपचारका लागि बुटवल पठाइएको प्रहरीले जनाएको छ।
पहिरोमा अझै तीन जना बेपत्ता छन्। बेपत्ता हुनेमा ९ वर्षीय अशिम पुन मगर, ८० वर्षीय अजम्बर पुन मगर र ७२ वर्षीय लिलबहादुर पुन मगर रहेका छन्।
बेपत्ताको खोजी तथा उद्धारका लागि सुरक्षाकर्मी परिचालन गरिएको छ। अविरल वर्षाका कारण उद्धार तथा खोजी कार्यमा समेत कठिनाइ भइरहेको प्रहरीले जनाएको छ।
पहिरोले घर तथा गोठ पुरिएपछि ठूलो जनधनको क्षति भएको छ। घटनाबारे थप विवरण संकलन तथा क्षतिको आकलन गर्ने काम भइरहेको प्रहरीले जनाएको छ।