इरानविरुद्ध तय गरिएको सैन्य आक्रमण स्थगित

काठमाडौं, जेठ २९ । अमेरिकी राष्ट्रपति डोनाल्ड जे. ट्रम्पले इरानविरुद्ध तय गरिएको सैन्य आक्रमण र बमबारी स्थगित गरिएको घोषणा गरेका छन्। इरानसँगको वार्ता उच्च तहमा पुगेको र इरानी नेतृत्वबाट स्वीकृत भएको भन्दै उनले निर्धारित आक्रमण रद्द गरिएको बताएका हुन्।
राष्ट्रपति ट्रम्पले जारी गरेको वक्तव्यमा इरानसँगको छलफल अवधारणागत तथा विस्तृत रूपमा सबै पक्षबाट अनुमोदित भइसकेको उल्लेख गरेका छन्। उनका अनुसार उक्त प्रक्रियामा संयुक्त राज्य अमेरिका, इजरायल, साउदी अरेबिया, संयुक्त अरब इमिरेट्स (यूएई), कतार, टर्की, पाकिस्तान, बहराइन, कुवेत, जोर्डन, इजिप्टलगायतका मुलुकहरूको सहभागिता रहेको छ।
ट्रम्पले इरानसँगको सम्झौता अन्तिम रूप नपुग्दासम्म नौसैनिक नाकाबन्दी भने यथावत् रहने बताएका छन्। उनले सम्झौतामा हस्ताक्षर गर्ने समय र स्थानबारे छिट्टै जानकारी गराइने पनि उल्लेख गरेका छन्।
यस घोषणासँगै मध्यपूर्वमा बढ्दो तनाव कम हुने अपेक्षा गरिएको छ। पछिल्ला दिनहरूमा अमेरिका र इरानबीचको सम्बन्ध थप तनावपूर्ण बनेको अवस्थामा ट्रम्पको यो घोषणा कूटनीतिक पहलतर्फको महत्वपूर्ण कदमका रूपमा हेरिएको छ।
यद्यपि, उक्त सम्झौताका विस्तृत प्रावधान र कार्यान्वयन प्रक्रियाबारे थप विवरण सार्वजनिक गरिएको छैन। अन्तर्राष्ट्रिय समुदायले भने सम्भावित सैन्य टकराव टरेर संवादको माध्यमबाट समाधान खोज्ने प्रयासलाई सकारात्मक रूपमा लिएको छ।