मोदी–रवि भेटवार्ता : नेपाल–भारत सम्बन्धलाई नयाँ उचाइमा पुर्‍याउन सहकार्य गर्ने प्रतिबद्धता

काठमाडौं, जेठ २०। भारतीय प्रधानमन्त्री नरेन्द्र माेदीले राष्ट्रिय स्वतन्त्र पार्टी (रास्वपा) का सभापति रवि लामिछानेसँगको भेटप्रति खुशी व्यक्त गर्दै नेपालसँगको विशेष सम्बन्धलाई अझ सुदृढ बनाउन भारत प्रतिबद्ध रहेको बताएका छन्।
प्रधानमन्त्री मोदीले सामाजिक सञ्जालमार्फत रास्वपा सभापति लामिछानेसँग भेट भएको जानकारी दिँदै साझा समृद्ध भविष्यका लागि नजिकबाट सहकार्य गर्ने लामिछानेको चाहनालाई स्वागत गरेको उल्लेख गरेका छन्। उनले उक्त उद्देश्यप्रति आफू पूर्ण रूपमा सहमत रहेको पनि बताएका छन्।
मोदीले भारतको ‘नेबरहुड फर्स्ट’ (छिमेकी पहिलो) नीतिअन्तर्गत नेपाललाई प्राथमिकताप्राप्त साझेदारका रूपमा लिइएको उल्लेख गर्दै नेपालको नयाँ सरकारसँग सहकार्य गर्न भारत उत्सुक रहेको बताए। उनले नेपाल–भारतबीचको विशेष तथा बहुआयामिक सम्बन्धलाई अझ उच्च तहमा पुर्‍याउने दिशामा संयुक्त रूपमा काम गर्ने अपेक्षा व्यक्त गरेका छन्।
रास्वपा सभापति लामिछाने नेतृत्वको प्रतिनिधिमण्डल हाल भारत भ्रमणमा रहेको छ। सो क्रममा भारतीय राजनीतिक नेतृत्वसँग विभिन्न भेटघाट तथा छलफलहरू भइरहेका छन्। सभापति लामिछाने तथा उनकाे टाेली पाँच दिने भारत भ्रमणमा छन् ।