त्रिशूली–३ ‘ए’ को सुरुङबाट दुई कर्मचारीको जीवितै उद्धार

रसुवा, भदाै १९ । भोटेकोशीमा आएको विनाशकारी बाढीका कारण त्रिशूली–३ ‘ए’ जलविद्युत् आयोजनाको सुरुङभित्र फसेका दुई जना कर्मचारीको जीवितै उद्धार गरिएको छ।
भदौ १० गते आएको बाढी तथा पहिरोका कारण सुरुङ अवरुद्ध भएपछि संयुक्त खोज तथा उद्धार टोलीले भग्नावशेष र लेदो पन्छाउँदै सुरुङभित्र खोजी जारी राखेको थियो। सोही क्रममा शुक्रबार बिहान दुई जना कर्मचारीलाई जीवितै उद्धार गरिएको नेपाली सेनाले जनाएको छ।
जीवितै उद्धार गरिएकामा आयोजनामा कार्यरत मेकानिकल फोरम्यान सञ्जय शाह र मेकानिकल सुपरभाइजर कबीर महर्जन रहेका छन्।
उद्धारपछि दुवै जनाको प्रारम्भिक स्वास्थ्य परीक्षण गरिएको छ। उनीहरूलाई थप स्वास्थ्य परीक्षण तथा उपचारका लागि काठमाडौँ ल्याउने तयारी गरिएको छ।
सुरुङभित्र अझै उद्धार तथा खोजीको काम जारी रहेको नेपाली सेनाले जनाएको छ। बाढी र पहिरोका कारण सुरुङको प्रवेशमार्गसहित विभिन्न भागमा ठूलो मात्रामा लेदो तथा भग्नावशेष थुप्रिएपछि उद्धार कार्य चुनौतीपूर्ण बनेको थियो।
भोटेकोशीमा आएको बाढीले रसुवाको टिमुरे क्षेत्रसहित विभिन्न स्थानमा ठूलो जनधन तथा भौतिक संरचनामा क्षति पुर्‍याएको थियो। बाढीपछि त्रिशूली–३ ‘ए’ आयोजनाको सुरुङमा केही कर्मचारी फसेको जानकारी पाएसँगै नेपाली सेनासहित सुरक्षा निकाय र प्राविधिक टोलीले संयुक्त रूपमा खोज तथा उद्धार अभियान सञ्चालन गर्दै आएका थिए।