३८ वर्षपछि डडेल्धुराका १२ परिवारले पाए लालपुर्जा

काठमाडौं , साउन २३ । सुकुम्बासी समस्या समाधान आयोगले नापनक्सा गरेको ३८ वर्षपछि डडेल्धुराको परशुराम नगरपालिका–१२ का १२ परिवारले जग्गाधनी दर्ता प्रमाणपुर्जा (लालपुर्जा) प्राप्त गरेका छन्।
साविक जोगबुढा गाविस–१ मा २०४५ सालमा सुकुम्बासी समस्या समाधान आयोगले नापनक्सा गरेको भए पनि त्यसपछिको प्रक्रिया अघि बढ्न नसक्दा स्थानीयले लामो समयसम्म जग्गाधनी पुर्जा पाउन सकेका थिएनन्।
त्यसपछि २०५५ साल पुस २६ गते पुनः सुकुम्बासी समस्या समाधान आयोगले प्रक्रिया अघि बढाएको थियो। तर, आयोगबाट सुरु भएको प्रक्रिया पूर्ण हुन नसक्दा पुर्जा वितरण हुन सकेन।
विगतका आयोगबाट सुरु भएको काम अधुरै रहँदा परशुराम नगरपालिका–१२ अन्तर्गत खजुरानी र तुलाभाडी गाउँका स्थानीय लामो समयदेखि जग्गाधनी प्रमाणपुर्जाको पर्खाइमा थिए।
लामो समयदेखि रोकिएको प्रक्रिया अघि बढेपछि १२ परिवारले अन्ततः आफ्नो जग्गाको कानुनी स्वामित्व प्रमाणित गर्ने लालपुर्जा प्राप्त गरेका हुन्। यससँगै वर्षौंदेखि जग्गा भोगचलन गर्दै आए पनि स्वामित्वको प्रमाण नपाएका स्थानीयको लामो प्रतीक्षा अन्त्य भएको छ।