सुनको सिक्री लुटपाट र बिक्रीमा संलग्न दुई जना पक्राउ

काठमाडौँ, जेठ ११ । काठमाडौँका विभिन्न स्थानमा महिलाको घाँटीबाट सुनको सिक्री लुटपाट गर्ने तथा लुटिएको सुन बिक्री वितरणमा संलग्न दुई जनालाई प्रहरीले पक्राउ गरेको छ ।
जिल्ला प्रहरी परिसर काठमाडौँका अनुसार गत वैशाख २४ गते काठमाडौँ महानगरपालिका–७ चावहिलस्थित आकाशे पुलमा एक महिलाको घाँटीबाट सुनको सिक्री लुटपाट गरिएको थियो । यस्तै, जेठ ९ गते बसुन्धरास्थित केल्कीनारायण मन्दिर दर्शन गर्न आएकी अर्की महिलाको घाँटीबाट पनि सुनको सिक्री लुटिएको थियो ।
प्रहरी वृत्त महाराजगञ्जबाट खटिएको टोलीले घटनामा संलग्न जिल्ला सङ्खुवासभा सभापोखरी गाउँपालिका–७ घर भई हाल टोखा नगरपालिका बस्ने ४६ वर्षीय रामकुमार तामाङलाई पक्राउ गरेको जनाएको छ । प्रहरीले तामाङलाई लुटिएको सुनको सिक्रीसहित नियन्त्रणमा लिएको हो ।
यस्तै, लुटिएको सुन बिक्री वितरणमा संलग्न रहेको आरोपमा ललितपुर महानगरपालिका–१ घर भएका ६३ वर्षीय किशोर थापालाई पनि प्रहरीले पक्राउ गरेको छ । प्रहरी वृत्त गौशालाबाट खटिएको टोलीले चावहिल क्षेत्रबाट उनलाई पक्राउ गरेको जनाएको छ ।
प्रहरीले घटनाबारे थप अनुसन्धान भइरहेको जनाएको छ ।