दशैं अवधिभर मनसुनी गतिविधि, असोज १७ देखि वर्षा तीव्र हुने

काठमाडौं, असाेज १५ । दशैंको समयमा पनि मनसुनी वायुको प्रभाव कायम रहने भएको छ। जल तथा मौसम विज्ञान विभाग, मौसम पूर्वानुमान महाशाखाले असोज १७ गतेदेखि नेपालका धेरै प्रदेशमा वर्षा तीव्र हुने चेतावनी दिएको छ।

हाल मनसुन वायु केही कमजोर भए पनि बंगालको खाडीमा बनेको न्यून चापिय प्रणाली भारतको ओरिसाबाट जमिनतर्फ प्रवेश गरी मध्य भारततर्फ सर्दैछ। यसको प्रभाव नेपालमा पर्ने भएकाले दशैंभर वर्षा हुने विभागको आकलन छ।

महाशाखाका अनुसार असोज १७ गते (एकादशी) कोशी, बागमती, गण्डकी र लुम्बिनी प्रदेशका पहाड र तराई भूभागमा वर्षा हुने देखिन्छ। १८ गते (द्वादशी) कोशी, मधेश, बागमती, गण्डकी र लुम्बिनी प्रदेशमा वर्षा अझ व्यापक हुने र कतिपय स्थानमा भारीदेखि धेरै भारी वर्षा पर्न सक्ने सम्भावना छ। १९ गते (त्रयोदशी) पनि यी प्रदेशहरूमा निरन्तर वर्षा हुने, साथै केही स्थानमा अति भारी वर्षा समेत हुने अनुमान गरिएको छ।

यसरी दशैंको अन्त्यतिर मनसुन अझ सक्रिय हुने भएकाले देशका विभिन्न क्षेत्रमा भू-क्षय, बाढी, पहिरोको जोखिम बढ्ने चेतावनी दिइएको छ। विभागले सडक तथा हवाई यातायात अवरुद्ध हुन सक्ने भएकाले मौसमसम्बन्धी जानकारी नियमित लिन र सतर्कता अपनाउन सबैलाई आग्रह गरेको छ।