विश्वप्रसिद्ध लुभ्र म्युजियमबाट गहना चाेरी

काठमाडौं, कार्तिक ४ । फ्रान्सको राजधानी पेरिसस्थित विश्वप्रसिद्ध लुभ्र म्युजियममा आइतबार बिहान भएको चोरी घटनाले त्यहाँकाे सांस्कृतिक जगत तथा सुरक्षा संयन्त्रलाई हल्लाइदिएको छ। संग्रहालयको “ ग्यालेरेइ डिअपाेलाेन्” नामक ग्यालेरीबाट राजघरानाका बहुमूल्य गहना चोरी भएका छन्।

फ्रान्सका अधिकारीहरूका अनुसार आइतबार बिहान करिब ९:३० बजे चार जना मास्कधारी लुटेराहरूले अत्याधुनिक उपकरण प्रयोग गरी म्युजियममा प्रवेश गरेका थिए। उनीहरूले केही मिनेटमै ग्यालेरीको सुरक्षा संयन्त्र काटेर आठदेखि नौवटा ऐतिहासिक गहना लिएर फरार भएका छन्। तीमध्ये केही गहनाहरू नापोलेनिक युगका रहेका थिए।

चार मिनेटमा सम्पन्न डकैती

फ्रान्सेली सञ्चारमाध्यमका अनुसार चोरी “चार मिनेटमा सम्पन्न” भएको बताइएको छ। लुटेराहरूले एउटा ट्रकमा जडान गरिएको बास्केट लिफ्ट (उचाल्ने प्लेटफर्म) प्रयोग गरी भवनको बाहिरी भागबाट सिधा ग्यालेरीमा प्रवेश गरेका थिए। त्यहाँ उनीहरूले चेसिस काट्ने डिस्क कटर प्रयोग गरेर प्रदर्शन कचेरा फुटाएका थिए।

लुभ्र म्युजियम बन्द

घटनापछि लुभ्र म्युजियमले विशेष कारण देखाउँदै म्युजियम बन्द गरिएको घोषणा गरेको छ। हजारौं पर्यटकका लागि प्रमुख गन्तव्य बनेको यो संग्रहालय मंगलबारसम्म पनि बन्द रहने बताइएको छ। फ्रान्सको संस्कृति मन्त्रालयले यस घटनाप्रति “गहिरो दुःख” व्यक्त गर्दै सुरक्षा प्रणालीको पूर्ण पुनर्मूल्यांकन गर्ने जनाएको छ।

“हामी असफल भयौं” – मन्त्री

फ्रान्सका गृहमन्त्री जेराल्ड डार्मानिनले घटनालाई “राष्ट्रको सांस्कृतिक सम्पदामाथिको आक्रमण” भन्दै तत्कालीन सुरक्षा कमजोरी स्वीकार गरेका छन्। “हामी असफल भयौं,” उनले भने, “अब संग्रहालय सुरक्षामा ठूलाे सुधार गर्नैपर्ने भएको छ।”

चोरी भएका सामग्री

चोरीमा परेका गहनामा राजघरानाका टियारा, मणिजडित हार, ब्रोच, झुम्का र मुकुटहरू रहेका छन्। तिनीहरूमध्ये केही एम्प्रेस युजेनीको गहनासँग सम्बन्धित रहेको बताइएको छ। प्रहरीका अनुसार चोरीका केही गहना क्षतिग्रस्त अवस्थामा केही फेला परे पनि अधिकांश अझै बेपत्ता छन्।

अनुसन्धान र अन्तर्राष्ट्रिय खोजी

फ्रान्सेली प्रहरी र अन्तर्राष्ट्रिय अपराध अनुसन्धान निकाय इण्टरपोलको संयुक्त टोलीले अनुसन्धान थालेको छ। घटनास्थल वरपरको सिसिटिभी फुटेज, ड्रोन निगरानी र फरेन्सिक प्रमाण संकलन भइरहेको जनाइएको छ। प्रारम्भिक अनुसन्धानका अनुसार यो काम संगठित आपराधिक समूहसँग सम्बन्धित हुनसक्ने अनुमान गरिएको छ।

सांस्कृतिक चिन्ता र आर्थिक असर

लुभ्र म्युजियममा यस्ता अमूल्य वस्तुहरूको चोरीले फ्रान्सको सांस्कृतिक पहिचान र पर्यटन क्षेत्र दुबैमा ठूलो असर पार्ने अनुमान गरिएको छ। हरेक वर्ष करिब ८० लाखभन्दा बढी पर्यटक आउने यो म्युजियम विश्वकै सबैभन्दा धेरै भ्रमण हुने सांस्कृतिक स्थल हो।

सिकाइ र सुधारको आवश्यकता

विशेषज्ञहरूका अनुसार पुराना संरचना र नयाँ प्रविधिबीचको असन्तुलनले यस्तो घटना सम्भव बनाएको हो। उनीहरूले संग्रहालयहरूमा डिजिटल ट्र्याकिङ, बायोमेट्रिक सुरक्षा र २४ घण्टा निगरानी प्रणाली जस्ता प्रविधि अनिवार्य गर्नुपर्ने सुझाव दिएका छन्।

फ्रान्सेली सरकारका अनुसार चोरीमा संलग्न व्यक्तिहरूलाई पक्राउ गर्न ‘हाई-अलर्ट’ मोड मा खोजी जारी छ।

(तल केही फाेटाेमा चाेरी सम्बन्धि दृश्यलाई हेर्न सकिन्छ ।)

एजेन्सीहरूकाे सहयाेगमा